नवीन आठ कोरोना बाधीत रुग्णांच्या संपर्कातील व्यक्तींचा शोध पूर्ण : जिल्हाधिकारी के.मंजुलक्ष्मी

सिंधुदुर्गनगरी : जिल्ह्यात नव्याने आढळलेल्या 8 कोरोना बाधीत रुग्णांच्या संपर्कात आलेल्या सर्व व्यक्तींचा शोध पूर्ण झाला असून संपर्कातील सर्व व्यक्तींना अलगीकरणात ठेवण्यात आले आहे. या नवीन 8 रुग्णांच्या संपर्कात आलेल्या व्यक्तींची संख्या 110 इतकी आहे. त्यापैकी 46 व्यक्ती या अतिजोखमीच्या संपर्कातील असून कमी जोखमीच्या संपर्कातील व्यक्तींची संख्या 64 आहे. त्यामध्ये डामरे येथील कुटुंबाच्या संपर्कात एकूण 21 व्यक्ती आल्या आहेत. त्यापैकी 4 जण हे अतिजोखमीच्या संपर्कातील तर 17 जण हे कमी जोखमीच्या संपर्कातील आहेत. धालकथी येथील रुग्णांच्या संपर्कात एकूण 26 व्यक्ती आल्या आहेत. त्यातील 2 जण अती जोखमीच्या संपर्कातील तर 24 व्यक्ती या कमी जोखमीच्या संपर्कातील आहेत. हिवाळे येथील रुग्णाच्या संपर्कात एकूण 40 व्यक्ती आल्या आहेत. त्यापैकी 22 व्यक्ती या अतिजोखमीच्या संपर्कातील असून 18 जण कमी जोखमीच्या संपर्कातील आहेत. 23 जण नाधवडे येथील रुग्णाच्या संपर्कात आले आहेत. त्यापैकी 18 जण हे अतिजोखमीच्या व 5 जण हे कमी जोखणीच्या संपर्कातील आहेत.

कणकवली तालुक्यातील डामरे, वैभववाडी तालुक्यातील नाधवडे व मालवण तालुक्यातील हिवाळे येथे 5 जून 2020 रोजीपर्यंत कंटेन्मेंट झोन जाहीर करण्यात आला आहे. डामरे कंटेन्मेंट झोनमध्ये 32 घरांचा समावेश आहे. त्यामध्ये 39 कुटुंबे असून या क्षेत्राची लोकसंख्या 123 इतकी आहे. तर नाधवडे बाधीत क्षेत्रामध्ये 130 घरातील 147 कुटुंबांमधील 518 लोकसंख्येचा समावेश आहे. हिवाळे बाधीत क्षेत्रामध्ये 69 घरांमधील 81 कुटुंबातील 286 व्यक्तींची समावेश आहे. तर धालकथी येथे सापडलेले दोन्ही रुग्ण हे संस्थात्मक अलगीकरणात होते.

जिल्ह्यात एकूण 21 हजार 320 व्यक्ती संस्थात्मक अलगीकरणात असून त्या पैकी 505 व्यक्ती या शासकीय संस्थात्मक अलगीकरण कक्षात आहेत. गावपातळीवर 20 हजार 815 व्यक्तींना अलगीकरण कक्षात ठेवण्यात आले आहे. जिल्ह्यात प्रवेश केलेल्या इतर सर्वांना गृह अलगीकरणात ठेवले आहे. जिल्हा रुग्णालयाने एकूण 1 हजार 368 नमुने तपासणीसाठी पाठविले असून त्यापैकी 1 हजार 150 तपासणी अहवाल प्राप्त झालेत. त्यातील 16 अहवाल पॉजिटीव्ह आले असून उर्वरीत 1 हजार 134 अहवाल निगेटीव्ह आलेत. 218 नमुन्यांचा अहवाल प्राप्त झालेला नाही. जिल्हा सामान्य रुग्णालयातील विलगीकरण कक्षात सध्या 67 रुग्ण दाखल आहेत. त्यापैकी 41 रुग्ण डेडिकेटेड कोवीड हॉस्पिटलमध्ये, 26 रुग्ण डेडिकेटेड कोवीड हेल्थ केअर सेंटरमध्ये ठेवलेत. आरोग्य यंत्रणेमार्फत आज रोजी 4 हजार 845 व्यक्तींची तपासणी करण्यात आली. जिल्ह्यातील एकूण 16 कोरोना बाधीत रुग्णांपैकी 7 रुग्ण कोरोना मुक्त झाले असून सध्या 9 रुग्णांवर उपचार सुरू आहेत.

सिंधुदुर्गनगरी येथून पाचवी श्रमीक विशेष रेल्वे रवाना

सिंधुदुर्गनगरी रेल्वे स्थानकातून आज पाचवी श्रमीक विशेष रेल्वे सोडण्यात आली. दुपारी 1.00 वाजता राजस्थानातील जयपूर कडे ही रेल्वे रवाना करण्यात आली. या श्रमीक विशेष रेल्वेने राजस्थानातील 351 मजूर, कामगार त्यांच्या मुळ गावी रवाना झाले. यावेळी प्रशासनाच्या वतीने त्यांना फुड पॅकेट्स, पाणी बॉटल्स, मास्क, सॅनिटायझरचे वाटप करण्यात आले. प्रवाश्यांना निरोप देण्यासाठी अप्पर जिल्हाधिकारी, उपविभागीय अधिकारी व पोलीस अधिकारी उपस्थित होते.

परराज्यातून व महाराष्ट्र राज्याच्या अन्य जिल्ह्यातून सिंधुदुर्ग जिल्ह्यात दि.  2 मे 2020 पासून आज अखेर एकूण 38 हजार 439 व्यक्ती दाखल झाल्या आहेत. त्यामध्ये खारेपाटण चेकपोस्ट येथून 28 हजार 265, फोंडा – 2 हजार 81, करुळ – 3 हजार 816, आंबोली – 1 हजार 636, बांदा – 1 हजार 838, दोडामार्ग – 803 व्यक्तींनी जिल्ह्यात प्रवेश केला आहे.